今晚上演兩場意甲，萊切率先主場迎戰羅馬，論整體實力，無疑羅馬佔上風，但萊切由羅馬名宿迪法蘭斯高執教，勝在知己知彼，應該可以作出針對性部署牽制對手，估計羅馬最多小勝。考慮到客Ｗ太熱冇肉食，睇番兩隊近5次交鋒有4次總入球開2球或以下，寧願博2.5球入球細。（Now 638周二凌晨零時30分直播）文:Mic少
萊切上年6月聘請迪法蘭斯高領軍並護級成功，今季亦有好開始，上輪聯賽開鑼戰作客以2比0擊敗升班球隊威尼斯，不過今仗對手係上季季軍羅馬，萊切想再贏波機會甚微，預料迪法蘭斯高會採取穩陣戰術，以和波拎1分為目標。呢位56歲意大利教頭球員生涯曾於1997至2001年效力羅馬，並於2017至2019年執教呢支首都球隊，對於對方底細瞭若指掌，相信有辦法抵禦羅馬攻勢。
阿特蘭大態勇捧主Ｗ
至於羅馬上仗主場大勝費倫天拿4比0，前鋒唐耶爾馬倫上演「帽子戲法」入3球，的確非常勇猛。不過，羅馬作客水準往往打折扣，上季試過作客0比1輸畀弱隊卡利亞里，對萊切亦僅贏2比0，唔好期望今仗會大炒對手，入球細比客Ｗ抵玩。
另1場意甲，阿特蘭大主場對博洛尼亞，阿特蘭大狀態明顯勝一籌，首輪聯賽以2比1擊敗薩斯索羅，加上熱身賽及歐協聯，近5場取得4勝1和。反觀博洛尼亞上場意甲主場0比1不敵拉素，球員仲未上力，阿特蘭大可趁機再下一城捧主勝。（Now 638周二凌晨2時45分直播）
